பிப்ரவரி 21-ம் தேதி கட்சி தொடங்குவதாக அறிவித்திருக்கும் நடிகர் கமல்ஹாசன், தனது ரசிகர்களை இன்று ஆழ்வார்பேட்டை இல்லத்தில் சந்தித்தார்.
அப்போது ரசிகர்களிடையே கமல் பேசியதாவது:-
நாம் வெற்றியை நோக்கி செல்கிறோம். மற்றவர்களைப் போல நாம் கஜானாவை நோக்கி செல்லவில்லை. மக்களின் முன்னேற்றத்தை நோக்கி செல்கிறோம். ரசிகர்களை சந்திப்பது வழக்கம் தான் என்றாலும், தற்போது இலக்கு மாறியுள்ளது.
நாம் தேவையில்லாமல் யாரையும் சாட வேண்டாம். நானும் திருத்திக்கொள்வேன். நமக்கு விரோதிகள் என்பவர்கள், சமூகத்திற்கும் விரோதிகள்தான். இதுவரை உங்கள் சாதி என்ன? மதம் என்ன? எனக் கேட்டது கிடையாது. இனியும் அப்படித்தான் இருக்கும். இதற்கு முன்னால் நீங்கள் எந்தக் கட்சி எனக் கேட்டது கிடையாது. இனி நீங்கள் எந்தக் கட்சி என கேட்டு உறுதி செய்து கொள்வேன்.
