தமிழ் படைப்பாளிகளின் எழுத்துகள் சர்வதேச தரத்திற்கு நிகராக இருக்கிறது. ஆனால் அது ஒரு குறுகிய நில எல்லைக்குள் குறுகிய வணிகப்பரப்பிற்குள் இருக்கிறது.
இந்த நிலையில், தமிழின் பிரபல எழுத்தாளர்களான சாரு நிவேதிதா, பாலகுமாரன், பட்டுக்கோட்டை பிரபாகர், இந்திரா சௌந்தர்ராஜன் ஆகியோரின் நாவல்கள் தற்போது ஆங்கிலத்திலும் மொழிபெயர்க்கப்பட்டு வெளியாகியுள்ளன. இதுவரை ஆங்கில நாவல்களை மட்டுமே தமிழில் மொழிபெயர்த்து வந்த நிலைமாறி, தற்போது தமிழ் நாவல்களை ஆங்கிலத்தில் மொழிபெயர்க்கும் சூழ்நிலை உருவாகியுள்ளது.
இதன் மூலம் மண் மணம் மாறாமல், உயர்ந்த மானிட சிந்தனையோடு எழுதும் தமிழ் எழுத்தாளர்களின் படைப்புகள், உலகம் முழுவதும் உள்ள வாசகர்களை சென்றடையும் என எதிர்பார்க்கப்படுகிறது. இதனால் சர்வதேச அளவில் தமிழ் புத்தகங்களுக்கான சந்தையின் மதிப்பு உயரவும், பலதரப்பட்ட வாசகர்களை தமிழ் புத்தகங்கள் சென்றடைவதற்கும் வழிவகுக்கப்பட்டுள்ளது.
